|
|
خويا عادل الحكم ما جا منا ما جينا منو الحكم حيد حمرة ديال الوادني مع خافي حيد ليه الركبة صفرة هي اللخرة معطاهاش ليه عبد الحميد ضرب الشرايبي جبد صفرة شوية ردها للجيب و قاليه أخر مرة تعاودها
القانون كيقول أي مهاجم قاص الكرة بيديه متعمدا او غير متعمد كيتلغى الهدف الكرة ضربات فالفخد ديال انس باش و طلعات لليد و اليد هي اللي خلات الكرة توقف و سجل منها و لو كون مقاصتوش فيديه كان هو الاول غادي تلقاه كيحتج على الحكم و لكن ملي هو عارف راسو قاسها بقا غير كيضحك اما البيلانتي حكم الشرط هو اللي أعلن عليه ماشي حكم الوسط و الدليل أنه ملي عيطوا ليه الفار مفاتش فيها 5 الثواني و لغاها حيت مافيهاش ( حكم الوسط و جوج حكام فالفار عرفوا مافيهاش ) ايلا جينا نصفروا بحال هاديك بيلانتي ( و حنا عارفين الفحلي أكبر ممثل ) نلعبوا الباسكيط حسن ماشي الكرة
|
|
|
|
بالعودة لمجريات المباراة حنا اللي ربحنا نقطة اليوم حيت المردود ديالنا كان ضعيف اكثر واحد غامق على الجمهور هو النفاتي وتقول واش كيدير شي كرة صحيحة لا سونطراجات لا كوفرات لا كورنيرات و فاشل فالضغط و المساندة و كتلقى أمة ديال البشر كتدافع عليه المعموري ديال يكون احتياطي ماشي أساسي و ايلا بغيتي تدخلوا خاص يلعب قدام بلعامري حيت حتى هو من النوعية اللي كيبغي يدخل بالكرة و يضرب للبوطو الافريقي من جوج ماتشات كيبان لاعب ضعيف و حتى اللعابة مابقاوش تايقين فيه حيت ايلا كاع خداها كيعاود يردها ليهم الوسط بان دابا هو أنك تلعب بالشرايبي و حداه لمكعازي بوغرين فاشل حتى هو اليوم ضعيف كواري بزاف خافي كيتقاتل غا بوحدو و لكن مكيوصلوهش كواري حتى واحد ما عطاه شي كرة مزيانة
|
|
|
|
| إقتباس لمشاركة: | Rajaoui wanted | 00:26 - 2025/09/18 | | التعادل نتيجة واردة حتى في المواسم السابقة كان التعادلات ولكن يشدو علينا البالون بهاد الطريقة ماعقلتش اخر مرة داروها |
|
العام الفايت فالعصبة ربحونا فالزاولي ب 2-0 و لكن كان عندنا سكواد مشلل و بمشاكل بالجملة و بسابينطو كمدرب ماداروش لينا هاد الحالة اللي دارو اليوم آخر ماتش ضورو علينا فيه كرة كان فموسم 2018-2019 فمولاي عبد الله فالروتور اللي سالا ب 1-1 كانو ضورونا فيه و لكن فدونور و قدام 45 ألف واحد ماعمري عقلت عليهم شدونا هاكا
|
|
|
|
يلا جينا نشوفو الماتش بالعقل اليوم
الدفاع فيه مشاكل كبيييرة غانبدا ببانون الماتشات بجوج كيبان متلفها ديال بصح بانون باش يلعب خاص يكون قدامو كاسور مزيان و كيوصلوه غير الشايطات أما باش يلعب هو و خفيفي فبلوك طالع و قدامهم داك الحراك تاهو كيلعب كيبان بحال شي راجل عندو 50 عام لاعب فهاد الحالة غادي ناكلو العصى مزيان الماتش الأول الفتح را نااااقصين و كانو كيوصلو بسهولة لعند المهدي الحرار
الماتش ديال اليوم الخيش كانو قراب بزاف للمرمى واحد اللحظة فالشوط الثاني البلوك رجع حدا الحرار هي فاش شدونا مزيان
بلعمري بدنيا السيد ماقادرش يجري لا فماتش الفتح لا فماتش اليوم بلعمري كيطلع باش يرجع كيرجع كيتمشى السيد شهر 8 كامل دوزو مع المحلي مابين أوغندا و زامبيا و طنزانيا كيحرث فالتيرانات رجع للمغرب لعب مع المنتخب فالرباط ضد النيجر و عاود رجع لزامبيا لعب أساسي و من موراها بأربعة أيام لعب ضد الفتح فالبطولة و موراها لعب اليوم ضد الخيش را يلا ماخداش الراحة غادي ياخذ شي اصابة أو يجيه شي ارهاق مقود غادي يخرج عليه
نفس الشيء لبولكسوت و لو أن بولكسوت بنسبة أقل
نجي الوسط العزي كروسة gدمنا فيها الشابي لحد الساعة مافهمتش كيفاش عطاوه الموسم الماضي أحسن لاعب فالدوري التونسي و مافهمتش كيفاش التوانسة كيبكيو عليه فاش مشى من عندهم
المكعازي ماعمرو ماقنعني فالرجا و ماعمرو غادي يقنعني لاعب محايد طالع مع كرة هابط مع كرة بدون اضافة
بوغرين اليوم ماشي هو بوغرين نهار الفتح و هذا هو مشكل بوغرين ماتش كيبان ليك الطوب و ماتش كيبان ليك تالف
المعموري لاعب جد جد جد عادي لاعب ديال الدكة
|
|
|
|
بعد نهاية المبارة توجه جواد الزيات نحو مدرب الفريق لسعد الشابي و بدر بانون و أخبرهما باجتماع طارئ يوم غد صباحا في أكاديمية النادي للاستفسار حول الأداء الباهث الذي ظهر به النادي اليوم أمام الجيش الملكي.
غالبا الشابي غادي يعطيوه فرصة أخيرة فالماتشات الجايين ضد الجديدة و الماص يلا بقى الأداء على هاد الشكل فغالبا غادي يسيفطوه مع التوقف الدولي ديال أكتوبر قبل الديربي و غالبا هادشي اللي غادي يوقع
|
|
|
|
|
|
|
كاينين شي "رجاويين" غير بالاسم... قال ليك لاربيط جا من جيهتنا بفففف كاتفرجو مباشرة ولا شي ماتش معاود... القانون راه واااضح و بهاد القانون تخورنا تا طبنا... باراكا من تمثيل المثالية و "الحقانية" راه بنادم غير كايدير الضحك فراسو...
نتا معصب و كاتشوف و تسمع شي هدرة من شي قماقم "رجاويين" كاتبقى غاتشوف و تفضل السكوت .
على أي مستوى الفريق منحط للأسف و هذا واقع . فريق الطوبات حيوانات تمارة و ماجاورها يستاهلو الفوز و لكن للقدر رأي آخر .
شخصيا ضد رجوع اي لاعب من الخليج بعد رحيله... راه مايطلقوه حتى يتشلل ... المدرب نورمالمون ماكانش يبدا هاد العام اصلا و لكن الظرورف و صافي ... الرئيس ماتحدد حتال آخر لحظة و مايمكنش تصيفطو فديك الوقت .
يقدر يكون لعاب مشلل و يقدر يكون تكتيك المدرب لي كايبينو مشلل... فقط تغيير المدرب و التكتيك غادي يعطينا الاجابة الحقيقية ... على اي باقي الحال على الحكم غير هو كاين ميركاطو شتوي و فيه امكانية التعويض و لو بنسبة طفيفة خصوصا وسط الميدان المكمل .
|
|
|
|
التونسي نصر الدين النابي مرشح لتدريب فريق الرجاء
المدرب التونسي الذي فسخ العقد الذي يربطه بفريق كايزر تشيفش بسبب مرض زوجته.
ذكرت مصادرنا أن قرب المغرب من بلجيكا حيث تقيم زوجته و أصولها المغربية ، قد تدفع النابي إلى العودة إلى الدوري الاحترافي بعد تجربة سابقة مع الجيش الملكي.
لكن حتى يومنا هذا يبقى الشابي المدرب الأول لفريق الرجاء ، قبل مباراة الجولة الثالثة من الدوري الاحترافي ضد الدفاع الحسني الجديدي.
|
|
|
|
| إقتباس لمشاركة: | Youssef Lucci | 16:11 - 2025/09/18 | التونسي نصر الدين النابي مرشح لتدريب فريق الرجاء
المدرب التونسي الذي فسخ العقد الذي يربطه بفريق كايزر تشيفش بسبب مرض زوجته.
ذكرت مصادرنا أن قرب المغرب من بلجيكا حيث تقيم زوجته و أصولها المغربية ، قد تدفع النابي إلى العودة إلى الدوري الاحترافي بعد تجربة سابقة مع الجيش الملكي.
لكن حتى يومنا هذا يبقى الشابي المدرب الأول لفريق الرجاء ، قبل مباراة الجولة الثالثة من الدوري الاحترافي ضد الدفاع الحسني الجديدي. |
|
الزيات فاش شد الرئاسة ديال الرجا ماحاملش يبقى الشابي حيتاش التوصيات اللي تعطاوه كانت هي أن الشابي لا يصلح للرجا و كان اتصل قبل ماتبدى البطولة ببعض المدربين من بينهم زينباور و فالدو ( الوقيتة اللي خرجات اشاعات على رحيل الشابي ) الشابي عندو واحد الفئة كبيرة من الجمهور كيعجبهم بزاااف كيتصور عليهم و كيسرحهم بدوك جوج ألقاب اللي دا الكاف و كأس العرب بنادم كون كان كيفكر شوية يرجع لفترة الشابي من أبريل 2021 تال نونبر 2021 6 أشهر جا لقى الفرقة فيها الزنيتي - الشاكير - الورفلي - متولي - الحافيظي - نغوما - رحيمي - مالانغو - أحداد ... أصلا جا لقى فرقة واقفة على الصح و واصلة لربع نهائي الكاف متصدرة المجموعة ديالها ب 18 نقطة ربحو جميع الماتشات ديالهم ذهاب و اياب و فكأس العرب جا لقى الفينال هنا فالرباط نيشان البطولة كان وصيف مع الوز ب 4 النقط فاش جا أصبح وصيف ديال الوز ب 9 النقط و الخيش كانو قراب يديو ليه المركز الثاني بعدما كان بعيد عليهم ب 15 نقطة كانو شوية و يجيبوه واحد الوقت وصلو لفارق 3 النقط معاه عندو الزهر الماتشات الأخيرة كانت ضد فرق ضعيفة و كأس العرش كان تقصى من الربع ضد وحدة من أكفس نسخ الخيش الفترة ديال الشابي ماكانش شي طكتيك معين الفرقة هجوميا هازها رحيمي و مالانغو و بنسبة أقل الحافيظي دفاعيا كان هازها الورفلي و الهدهوي و الشاكير فالصيف الأنلدوسي باع ليه كولشي وجاب ليه الكرارس و خرج قاليهم عندي 25 ملاعبي و الفرقة ماكاتوقف على تا واحد كان كيجلس متولي فالاحتياط و كيلعب جبرون 10 فوحدة من التسطيات اللي دازت فالرجا جراو عليه بعدما الوز فزعونا فالبطولة الدورة 10 الوز كانو فايتينا ب 11 نقطة
من بعد فاش خرج من الرجا بقى مشومر واحد 8 أشهر تقريبا تال مارس 2022 شد النجم الساحلي اللي كانو لاعبين على البطولة زكل ليهم البطولة و سيفطوه فنهاية الموسم يونيو 2022 من بعد شد الجديدة هبط معاهم للقسم الثاني فنفس الموسممن بعد شتنبر 2023 عاد شد السواحلية الليبي اللي دارو أحسن ميركاتو فتاريخ ليبيا جابو ليه كهربا من مصر جابو ليه ألان طراوري من مازمبي جابو ليه سيرج أوريي اللي كان فباريس و طوطنهام ... دوز شهرين 0 انتصار سيفطوه مشى للكويت شد كاظمة الكويتي خرج عليهم فالاتحاد الأسوي و خسر ضد فرقة من اليمن اللي ماعندهم بطولة و عندهم الروينة فبلادهم تقصى ضدهم بعدما ضربوه ب 5-2 فالكويت من بعد تشومر واحد 3 أشهر عاد جابوه الرجا
العام اللي فات جا نقذ الفريق اللي كان كيلعب على وسط الترتيب ماكانش عندو لاعبين وقف فرقة غير باش ماتهبطش للقسم الثاني تعادل فأغلب الماتشات ( من أصل 9 الماتشات ربح 5 الماتشات (الزمامرة - المحمدية - الجديدة - مكناس) و تعادل ف 4 الماتشات مع الوز - تطوان - الخيش - الفتح و جاب المركز السادس و فكأس العرش خسر ضد فريق من القسم الثاني أداء و نتيجة الاتحاد الاسلامي الوجدي
الشابي من طينة المدربين ديال الأندية المتوسطة لا فالمغرب لا فتونس بحال أسفي - الجديدة - مكناس - المنستير - قوافل قفصة....
هادي من الأخطاء اللي دار الزيات من الأول مابدلوش غير خاف ينوض الصداع فحالة جاب مدرب آخر و مامشاتش معاه الكرة الشابي ماعندو مايضيف للرجا و ماعندو مايدير فالرجا العودة ديالو شبيهة بالعودة ديال الطاوسي للرجا قبل عامين
|
|
|
|
حتى النابي ماشي من المدربين الكبار مدرب بحالو بحال الشابي و فيه التفلسيف بزاف تاهو
حاليا الرجا خاصها مدرب اللي كتعرفو مزيان و قادر يعطي اضافة للفريق و يخرج الماكسيموم من اللاعبين و أحسن حاجة يطرقو المسمار مع المدرب الآن باش يبدى مع التوقف الدولي الجاي ديال أكتوبر
|
|
|
|
أولى خطوات نجاح المكتب الجديد: "إنهاء بدعة المدرب التونسي في الرجاء"
|
|
|
|
إنهاء عقد الشابي " أسهل منه مفيش "
الإشكال فقط غير فـ البديل لي خصو يكون " قدر الإمكان " مضمون
حيت سابقاً كان طيب الذكر محمد فاخر تيهنينا فمثل هاد الضروف ، حالياً مكينش شي خيار مضمون بنسبة كبيرة
|
|
|
|
هاد المدرب عندنا واقيلا مختل عقليا أو كيدخل للتيران مبوق
السيد فتصريح بعد المباراة قالك الجيش سيطرات فالشوط الأول و لكن فالثاني استرجعنا السيطرة بعد التغييرات اللي درت
واااااا الشريف أ سبحان الله واش كتفرج بالمقلوب و لا مالك ؟؟؟؟؟؟
علاه بالسلامة هاد الجيش وقتاش ماركات و تصفر ليه بينالتي ؟؟؟ فالشوط الأول ؟؟؟؟
و ملي استرجعتي التوازن فين هوما هاد الفرص اللي خلقتي و هاد الضغط اللي خاصك دير فبلادك و بمساندة جماهيرك (ماشي غير جمهور) ؟؟؟؟؟؟
|
|
|
|
لسعد الشابي بين مطرقة الجمهور وسندان المسؤولية
يعيش فريق الرجاء الرياضي مرحلة حساسة مع مدربه لسعد الشابي، الذي بات محور جدل واسع في أوساط الجماهير الرجاوية. المباراة أمام الجيش الملكي أخرجت إلى السطح العديد من علامات الاستفهام حول قدرة المدرب على تدبير المباريات الكبرى من الناحية التكتيكية. إذ اعتبر الكثيرون أن قراءته للقاء كانت باهتة، وأن تدخلاته التقنية لم ترق إلى مستوى تطلعات جماهير نادي بحجم الرجاء.
من بين أبرز النقاط التي أثارت غضب الأنصار مثلا إصرار الشابي على إشراك اللاعب موزريس رغم تواضع مستواه، وهو ما جعل الفريق يظهر بوجه غير مقنع داخل رقعة الميدان. هذا العناد التكتيكي وغياب الجرأة في تغيير الأسماء التي لا تقدم الإضافة، زادا من حدة الانتقادات.
إلى جانب ذلك، لم تسلم خرجات المدرب الإعلامية من الانتقاد، إذ غالبا ما تتسم بنبرة استفزازية، لا تراعي تاريخ الرجاء ولا حجم انتظارات جماهيره. والأدهى من ذلك وصفه لبعض المنافسين بـ"الفرق الصغيرة"، وهو توصيف لا معنى له في كرة القدم الحديثة، حيث لا وجود لمباريات سهلة أو خصوم ضعفاء. ولعل الإقصاء المؤلم للرجاء من كأس العرش في الموسم الماضي، كان دليلا واضحا على أن الاستهانة بالخصوم خطأ قاتل.
اليوم، ومع اقتراب مباريات حاسمة اخرى ، فإن الإشارات التي يعطيها الشابي غير مطمئنة، وهو ما جعل الشك يتسرب إلى قلوب الجماهير بخصوص قدرته على قيادة سفينة الرجاء نحو بر الأمان. فالبداية المتعثرة في ظل انتصارات المنافسين تنذر بتكرار سيناريو الموسم الماضي، حيث فقد الفريق فرصا مهمة بسبب سوء التدبير.
إن تصحيح الأوراق يجب أن يكون أولوية قصوى قبل فوات الأوان، لأن الرجاء ليس مجرد فريق عادي، بل مؤسسة رياضية عريقة. والمكتب المديري بدوره يتحمل جزءا من المسؤولية، إذ من واجبه التدخل لضبط البوصلة وتصحيح المسار.
الخلاصة أن جمهور الرجاء اليوم لا يطلب المستحيل، بل يريد رؤية فريقه ينافس بشراسة ويستعيد هيبته. أما المدرب لسعد الشابي، فإن مستقبله مع النسور الخضر مرتبطا بحكم المكتب المديري لأن اي عثرة أخرى يعني أن مقصلة النقد ستكون أشد قسوة في قادم الأيام و الأهم هو وضع الهدف المبتغى أمام الأعين : الرجوع بالرجاء الى توهجه الوطني و القاري!
ددر
|
|
|
|
رسميا لسعد خردة خارج اسوار الراجا ما بين الدورة 3 و 5
ددر رانا عآارفينكم عندكم معلومات ان المدرب خرج من مفكرة الرئيس والاقالة مسألة وقت فقط
|
|
|
|
مقدرتش نعس البارح بسبب ديك الشوهة ... لمرود يجيو يضحكو عليك فدونور و نتا كتفزع فكورة كلشي كايتحمل المسؤولية من المدرب اللي بين انه مخدم لا اطوماتيمات و لا والو للاعبين اللي خاصهم خصم 50% من رواتبهم الشهرية
|
|
|
|
السلام عليكم
اهلا وسهلا الخوت مرخبا بعودة الرفاق
نرجعو لماتش البارح
لاحول ولا قوة الا بالله العظيم
|
|
|
|
الشابي نصاب ولد الهم خورنا في الصيف بداك المعسكر الناشف اللعابة تقالين شي حارگ شي مبيطل عام شي بقات فيه هار السمية
|
|
|
|
مزاال الخوت مالعبناش مع بركان ديك الساعة غاتشوف واحد الطنطينة شوهة عالمية
|
|
|
|
كيف قالو الخوت
عدم جاهزية اللاعبين القدام والمنتدبين
والاهتمام باسماء معينة على بعض الاسماء ( الشرايبي
|
|
|
|
واحد الاظهرة كيطلعو وك خليو حمودان وسليم بوحدهم الكوميك
اما وسط الميدان فيه داك الهبيل لقا جوج سخيفات حداه ولينا لاعبين ب 5-0-5
|
|
|
|
قزمونا ولاد الهم لله يعطيهم العذاب
دبا ضروري تصيفط هاد المعاق ذهنيا وتقمر على مدرب
|
|
|
|
الزيات نهار طلع رئيس كان باغي يحيد الشابي و لكن خافوا يطرا نفس البلان ديال أنيس محفوظ مع فيلموتس خصوصا أن الشابي عندو واحد الفئة من الجمهور كدافع عليه الزيات قال طلعت بفضل الجمهور مايمكنش نخسر ليهم الخاطر و نجري على المدرب و فلخر الفرقة كلات الدق وقعتي لواحد ضعيف و ضيعتينا فواحد كان ينفعك ولو مؤقتا اللي هو مالونغو مايمكنش تقول ليا النجاري اولى اوبريغو حسن مالونغو سير دابا حتى لشهر 1 عاد جيب مهاجم يكون الذهاب سالا
الشان خدا جهد كبير من اللعابة خصوصا الاظهرة ايلا طلعوا صعيب تلقاهم راجعين و باين خاصهم الراحة
و كيف ما قريت فواحد الرد حاليا كلشي مخلص فالشطر الاول من المنحة و ماكاينش اللي كيتسال درهم علاش مايكونش خصم الفلوس من اللعابة اي تعادل او هزيمة خصوصا داخل الميدان نخصم ليك من الفلوس اللي كتسالني ... الاهلي راه ديما عندهم هاد القانون
|
|
|
|
كاين مفاوضات مع فاضلو اللي كان مساعد ديال زينباور و كاين مفاوضات مع المدرب البرتغالي اللي كان شاد الاهلي ( خرج من المونديال ب 0 انتصار ) و فالبطولة مافاتش معاهم 3 الدورات سيفطوه
|
|
|
|
| إقتباس لمشاركة: | عادل | 20:18 - 2025/09/18 | هاد المدرب عندنا واقيلا مختل عقليا أو كيدخل للتيران مبوق
السيد فتصريح بعد المباراة قالك الجيش سيطرات فالشوط الأول و لكن فالثاني استرجعنا السيطرة بعد التغييرات اللي درت
واااااا الشريف أ سبحان الله واش كتفرج بالمقلوب و لا مالك ؟؟؟؟؟؟
علاه بالسلامة هاد الجيش وقتاش ماركات و تصفر ليه بينالتي ؟؟؟ فالشوط الأول ؟؟؟؟
و ملي استرجعتي التوازن فين هوما هاد الفرص اللي خلقتي و هاد الضغط اللي خاصك دير فبلادك و بمساندة جماهيرك (ماشي غير جمهور) ؟؟؟؟؟؟ |
|
فاش جهلني قالك وقفنا الند للند ضد فريق كبير اللي هو الجيش و التعادل معاه ايجابي
|
|
|
|
| إقتباس لمشاركة: | عبدالله الرجاوي | 22:32 - 2025/09/18 | رسميا لسعد خردة خارج اسوار الراجا ما بين الدورة 3 و 5
ددر رانا عآارفينكم عندكم معلومات ان المدرب خرج من مفكرة الرئيس والاقالة مسألة وقت فقط |
|
حاليا الأولوية مع زينباور اللي ماباغاش طلقو الشبيبة و عندهم معاه شرط جزائي اللي هو الصالير ديالو ديال طول مدة العقد اللي هي سنتين فحالة لقى تخريجة مع الشبيبة فهاد المدة الجاية فهو اللي غادي يكون مدرب الرجاء الثاني هو فالدو الثالث هو ريفيرا اللي عاد فسخ العقد مع الأهلي الرابع هو النابي اللي عاد فسخ العقد مع كايزر شيفس
المدرب ماغاديش يخرج من هاد الربعة
الأكيد أن الشابي خارج أسوار الرجا قبل الديربي و لكن مني يغيزو مع البديل ديك الساعة غادي يكون الانفصال مع الشابي
|
|
|
|
| إقتباس لمشاركة: | sofraj | 00:22 - 2025/09/19 | | مقدرتش نعس البارح بسبب ديك الشوهة ... لمرود يجيو يضحكو عليك فدونور و نتا كتفزع فكورة كلشي كايتحمل المسؤولية من المدرب اللي بين انه مخدم لا اطوماتيمات و لا والو للاعبين اللي خاصهم خصم 50% من رواتبهم الشهرية |
|
أحسن حاجة دار الزيات مع اللاعبين هو بند المردودية فالبريمات
|
|
|
|
| إقتباس لمشاركة: | الخضرة الوطنية | 00:41 - 2025/09/19 | | الشابي نصاب ولد الهم خورنا في الصيف بداك المعسكر الناشف اللعابة تقالين شي حارگ شي مبيطل عام شي بقات فيه هار السمية |
|
المدير الرياضي فاش جا دوز المعسكر الأول دار تقرير خامج على الشابي و نصح ادارة الرجا باش تبدلو ( را كنت كتبتها هنا فاش سالا المعسكر ) و لكن المشكل ادارة الرجا ماقدروش يحيدوه حيتاش واحد المجموعة من الجماهير كتقدس الشابي و كيشوفوه هو أنشيلوتي و خافو من البديل ديالو لا ماتمشيش معه الكرة و ينوض الصداع على الادارة أحسن حاجة دارتها ادارة الرجا عطاوه هاد البدية و فاش تفرش و كولشي ضار ليه غادي يجيبو البديل على خاطرهم
|
|
|
|
| إقتباس لمشاركة: | الخضرة الوطنية | 00:42 - 2025/09/19 | | مزاال الخوت مالعبناش مع بركان ديك الساعة غاتشوف واحد الطنطينة شوهة عالمية |
|
بركان هاد العام ناقصين على داك العام كنظن الماتش ديالهم مع الراجا مازال بعيد الدورة 7 يمكن و الوقت اللي غادي نلعبو معاهم غادي يكونو بداو مجموعات العصبة و غادي يكون مدرب جديد ان شاء الله
|
|
|
|
| إقتباس لمشاركة: | عبد المالك | 02:22 - 2025/09/19 |
كاين مفاوضات مع فاضلو اللي كان مساعد ديال زينباور و كاين مفاوضات مع المدرب البرتغالي اللي كان شاد الاهلي ( خرج من المونديال ب 0 انتصار ) و فالبطولة مافاتش معاهم 3 الدورات سيفطوه |
|
المدرب الاسباني ريفيرو هو اللي كان شاد العام اللي فات أورلاندو بيراتس ربح معهم كأس جنوب افريقيا و جاب معهم المركز الثاني خلف صانداونز و وصل لنصف النهائي ديال العصبة مدرب ممتاز و عندو فكر هجومي الاشكال اللي وقع ليه مع الأهلي جابوه أسبوعين قبل كأس العالم للأندية و تسناوه يطلعهم للدور الثاني من بعد الاقصاء جمهور الأهلي و الاعلام لصقو فيه الاقصاء و حقدو عليه و بغاو يسيفطوه و فالدوري لعب معاهم 4 الماتشات ربح جوج و تعادل فواحد و خسر ضد بيراميدز ( هاد الخسارة ضد بيراميدز كانت سبب فالاقالة ديالو )
فالدو طامع يشد منتخب طنزانيا فالكان الجاي خصوصا أنه طنزانيا عطاو للمدرب ديالهم من بعد الاقصاء من الشان آخر فرصة يجيب أحسن مركز ثاني و يتأهل للمحلق الافريقي ديال المونديال الشهر الجاي لاعبين ضد النيجر و زامبيا فحالة ماقدرش يجيب الملحق الافريقي غادي يسيفطوه و فالدو من بين الخيارات المطروحة للتعويض ديالو خصوصا من بعدما وصل مع سيمبا لنهائي للكاف كأول فريق طنزاني كيوصل لهاد الدور
كنظن الأقرب حاليا هوالتونسي النابي أو الاسباني فيريرو
|
|
| لا يمكن إضافة ردود لهذا الموضوع لأنه تجاوز الحد الأقصى وهو (500) رد |
Duhok Forum 3.0
